Охирги хабарларга кўра, мамлакатимизда коронавирусни юқтириб олганлар 11 нафарга етибди. Синовли кунларда ўзимизни муносиб тутишимиз жуда муҳим.

Айрим одамларнинг талвасага тушиб, ваҳима билан, худдики оч қолиб кетадиган каби ўзларини тутиши ҳайрон қоларли. Бу ҳақда кўп гапирилаяпти. Лекин масаланинг бошқа жиҳатини ҳам эсдан чиқармайлик. Бизда аҳоли бундай ҳолатларга аввал тушмаган, карантин ҳолатида ўзимизни қандай тутишимиз кераклиги ҳақида кўпчиликда етарли тушунча йўқ. Шунинг учун баъзи ҳудудларда ортиқча ваҳима юзага келган бўлиши мумкин.

Ваҳима билан кассаликни енгиш ўрнига баттар тарқатамиз. Хитой нима учун ушбу касалликни енгиб ўтди? Яқинда бир хабарни ўқиб қолдим, Хитой давлатида коронавирус билан касалланганлар сони камаймоқда. Асосий қисм касалланганларга уйига жавоб берилган ва вақтинча барпо этилган касалхоналар ҳам бузилмоқда. Бундай қисқа даврда 100 мингга яқин касалланганларни тузалиб кетишида қандай ижобий ишлар амалга оширилган.

Бу давлатда биринчи навбатда қатъий тартиб интизом билан карантин қоидаларига риоя қилинди. Ваҳима кўтарилмади, бозорларга чопиб қоплаб ун ва картошка маҳсулотларини сотиб олиб, сунъий навбатлар ва нархлар ошишига сабаб бўлмади. Киракашлари йўловчиларни 5-10 баробар қимматга ташимади. Аксинча, бирлашган ҳолда ҳаракат қилишди ва ушбу вирусни бутунлай енгмоқда.

Ибн Сино бобомиз “Ваҳиманинг ўзи ярим касалликдир. Ҳотиржамлик ярим соғлик. Сабр эса шифонинг бошланишидир”, деб бежиз айтмаган эканлар. Юртдошларимиз аста-секин вазиятни тушуниб етиб, қоидага кўра ҳаракат қилишни ўрганяпти. Менимча, ОАВ орқали санитария қоидаларига риоя қилиш билан биз яқинларимиз, фарзандларимиз, умуман, атрофимиздагиларга катта ёрдам беришимиз ҳақида тушунтириш ишларини кучайтиришимиз керак.

Аммо ҳозир расмий ОАВда вирусдан кўра ваҳима кўтармаслик ҳақида кўпроқ гапирилаётганга ўхшайди. “Ваҳима кўтарманг, ваҳима кўтарманг”, деб қайта-қайта айтаверилса, бу ҳам ваҳима ошишига сабаб бўлади, деб ўйлайман. Одамларда “булар шунча гапиряпти, вазият ёмонга ўхшайди”, деган фикр туғилиб қолиши ҳам мумкин. Шунинг учун ҳамма нарсани борича эҳтиросларсиз, ақл ўргатишларсиз айтишимиз, кўрсатишимиз керак.

Барчага хотиржамлик тилаган ҳолда, ваҳима ҳақида эмас, ўзимиз ва атрофимиздагиларнинг соғлиғи ҳақида кўпроқ қайғуришни тавсия қиламан. Бу карантин халқимизнинг жипслиги, бирдамлигини имтиҳондан ўтказувчи бир синов, деб қарашимиз лозим.

Руҳингиз енгил бўлсин!

Акмал ТУРСУНБОЕВ,

ЎзХДП Марказий Кенгаши бўлим бошлиғи