Ҳар бир миллатнинг орияти, ғурури, кўкси баланд мард инсонлар ўз фарзандлари, оиласи, Ватани учун керак бўлса жонини беради. Ҳа, бу миллатим, халқим, юртим дейдиган ҳар бир инсонга хос фазилат ва хусусиятдир.
Телевидениеда берилган Тошкент вилоятининг Ўрта Чирчиқ туманида 10 минг кишилик карантин худуди қурилаётгани ҳақидаги репортажни кўрдим. Чет мамлакатларда 10 кун ичида курилаётган карантин ҳудуди бизда 4-5 кунда фойдаланишга топширилди. Унда интервью берган оддий қурувчи йигит “Бугун биз бор кучимиз ва ҳаракатимиз билан ишлаяпмиз. Ватанимизни, халқимизни мардларча ҳимоя қиламиз”, деган юракдан отилиб чиққан самимий гапларини эшитиб, халқимизнинг мана шундай мард ва жасур, фидойи ва ватанпаравар фарзандлари бор экан бизнинг тинчлигимиз, осойишталигимизга ҳеч қандай нарса хавф сололмайди, деган ўй кечди.
Бугун бутун дунёни қамраб олаётган коронавирусга қарши курашаётган тиббиёт ходимлари, мен тилга олган оддий ишчидан тортиб, керак бўлса 24 соат ишлаймиз, деб турган қурувчилар, тинчлигимиз посбонлари ва бошқа соҳа ходимлари бундай шижоатни, ғайратни, фидойиликни сўзсиз Юртбошимиздан олганлари, давлатимиз раҳбарининг 34 миллионлик халқимиз соғлиғини ўйлаб қайғураётганликлари, кунда-кунора халқимизга мурожаатлари, даъватлари минглаб бу йигитларни, шифокору ҳамшираларни руҳлантиргани бор ҳақиқат.
Айниқса, ҳаётини хавф остига қўйиб, ҳар куни “олов” ичига кираётган шифокор ва ҳамшираларимиз меҳнатларини рағбатлантиришга қаратилган фармонлари тиббиётчиларимизни бениҳоя хурсанд қилганини эшитяпман. Яна бир алоҳида эътироф этиш, тилга олиш керак бўлган эзгу иш – бу хориждаги юртдошларимизни мамлакатимизга, уйларига, ота-оналари, фарзандлари бағрига қайтариш йўлидаги саъий – ҳаракатлар. Бугун минг-минглаб юртдошларимиз махсус чартер рейсларда турли мамлакатлардан олиб келинмоқда. Ҳозирги кунда Ўрта Чирчиқдаги карантин ҳудудига жойлаштирилган фуқароларимиздан, коронавирус касаллиги тарқалиб кетмаслиги учун кеча-ю кундуз шифокорлар назоратига олиняпти. Давлат томонидан озиқ-овқат билан таъминланяпти. Мана шундай қатъий чоралар ўз самарасини бериб, ҳозирги кунда 66 киши коронавирусдан холос бўлгани, соғайиб кетгани, карантинда сақланаётган кўплаб юртдошларимиз уйларига қайтаётгани мамлакатимизда инсон омили, манфаатлари, унинг ҳаёти ҳар нарсадан устун туришининг яна бир яққол исботидир. Бу табиийки, барчани хурсанд қиляпти.
Юртда оғир синов палласи кетар экан, бу тошқиндан кечиб ўтмоқ учун ҳамма бирдек ҳаракат қилмоғи муҳим. Эълон қилинган карантин тартибларига амал қилмаслик, мен бундан холиман дейиш ҳиссининг устунлиги, оддийгина ниқобсиз юрмаслик, транспорт ҳаракатларининг чекланиши каби ҳолатларга эътибо бермаслик, кибрдан бошқа ҳеч нарса эмас. Ўзбек халқининг бошига тушган барча синовларни, халқимиз мардоналарча енгиб ўтган. Синов даврида халқимиздаги садоқатлилик, бирдамлик, ўзаро бир-бирига бўлган меҳр-оқибат синовларни енгиб ўтишда, катта аҳамият касб этган. Ҳозирда бу борада маҳаллаларда Юртбошимиз бошчилигида жуда кўплаб ишлар тизимли равишда амалга оширилаяпти. Мана шундай ишлардан бири Хомийлик ҳайрияларини мувофиқлаштириш маркази ташкил этилгани, Давлатимизни, Юртбошимизни халқимизга бўлган эътиборлари деб биламан. Ҳар куни минглаб оилаларга марказ томонидан текинга озиқ-овкат маҳсулотлари ва дори-дармонлар тарқатилмоқда.Халқимиз бундан жуда миннаддор.
Бизнинг “Учтепа” маҳалла фуқаролар йиғинида ҳам коронавирусни олдини олиш мақсадида ҳар бир хонадонда тушунтириш ишлари олиб борилмоқда. Уларга ниқоб тақиб юришни, тўй-хашамларни вақтинча тўхтатишни, дафн маросимларида камчилик бўлиб иштирок этишни, зарурат бўлмаса кўчага чиқмасликни оилада фарзандлар –набиралар тарбияси билан шуғулланиш кераклиги айтиб ўтилмоқда. Давлатимиз томонидан таълимни онлайн тарзида дарсларни олиб борилаётганлиги ва фарзандлари билан дарсларда қатнашиш зарурлиги ҳақида тушунтирилмоқда. Маҳалламизда фуқароларимизни тинчлиги ва соғлигини ўйлаб,туну-кун ички ишлар ходимлари, миллий гвардия ва шифокорлар фидокорона меҳнат қилиб келмоқдалар. Миллий гвардия ходимлари ҳар икки соатда маҳалла кўчаларини айланиб, зарурат бўлмаса кўчага чиқмасликларини овоз кучайтиргич орқали машинада юриб огоҳлантирмоқдалар. Маҳаллада дизенфекция ишлари олиб борилмокда.
Маҳалладаги кам таъминланган ва ижтимоий ҳимояга муҳтож оилаларга давлатимиз ва ҳомийлар томонидан озиқ-овқатлар,кийим-кечаклар, ниқоблар текинга тарқатилмоқда. Давлатимиз томонидан ҳар 4-5 кунда арзонлаштирилган кўчма савдо ярмаркалари ташкил қилиняпти. Бу ишларни бошида турган Юртбошимиздан халқимиз ниҳоятда рози эканликларини ва албатта бу синовдан ҳам мардонавор ўтишликларини айтмоқдалар.
Мана шундай синовли дамларда биз депутатлар, маҳалла оқсоқоллари, фаоллари, нуронийлар, ёшлар барча –барчамиз Юртбошимиз даъватларига лаббай, деб жавоб бериб, уларнинг ёнларида туриб ўз оиламиз, маҳалламиз, туман, шаҳар ва вилоятимизда кўринмас бу балога қарши курашиш, касалликнинг тарқалиб кетишига йўл қўймаслик, халқимиз орасида хотиржамликни сақлаш учун масъулмиз.
Азиз, юртдошлар! Биз кутган осойишта кунларга етишимиз учун сабр ва қаноат керак. Албатта яна осойишта кунларга қайтиб, тўй-ю томошаларда, байрам ва тантаналарда бирга бўламиз. Ўзингиз ва оилангизни саломатлигини асранг.
Халқ депутатлари Тошкент шаҳар кенгаши депутати