Мамлакатимизда коронавирус пандемиясига қарши барча ишлар амалга оширилмоқда, юқори самара берувчи усуллардан фойдаланилмоқда.
Лекин шундай бўлишига қарамасдан, айрим юртдошларимиз вазиятга жиддий қарамасдан, карантин қоидаларини бузиб келишмоқда. Бу жуда ёмон ҳолат, инсоннинг ўзига ва бошқаларга нисбатан ҳурматсизлигидир. Шунинг учун аксарият давлатларда бунинг учун анча қатъий чоралар белгиланган.
Айрим давлатларда кўчага чиқиш учун алоҳида ҳужжатлар ёки рўйхатдан ўтиш талаб этилади. Масалан, Франция ва Италияда кўчага чиқиш сабабини тушунтирувчи алоҳида маълумотнома, Грецияда эса ариза, Қирғизистонда шахсини тасдиқловчи ҳужжат ва йўналиш варақаси бўлиши керак экан.
Хитойда карантин қоидаларини бузганлик учун 707 доллар жарима, 3 йилгача озодликдан маҳрум қилиш, оғир ҳолатларда эса 15 йилгача озодликдан маҳрум қилиш, ҳатто ўлим жазоси ҳам белгиланган.
АҚШда 11 апрелдан бошлаб катта фалокат режими жорий этилди:
Вайоминг штатида изоляция тартибини бузганлик учун 10 минг долларгача жарима ва 1 йилгача қамоқ жазоси;
Техасда 6 ойгача қамоқ жазоси ва 2 минг доллар жаримага тортиш белгиланган.
Италияда махсус рухсатномасиз кўчага чиқмаслик ва шаҳардан кетмасликка кўрсатма берилган. Мазкур тартибни бузганлик учун 3 ойга озодликдан маҳрум қилиш ёки 200 еврогача жаримага тортиш кўзда тутилган.
Францияда карантин шартларини бузганлик учун 130 евро жарима, 15 кун ичида қайта бузса 1500 евро жарима, 30 кун ичида 4 марта бузганлик учун 3700 евро жарима ёки 6 ойгача қамоқ жазоси белгиланган.
Россияда карантин қоидаларини бузганлик учун жарима миқдори 4 минг рублни, такрорий жавобгарликка тортилганда 5 минг рублни ташкил этади.
Исроилда карантинни қасддан бузганлик учун 7 йилгача озодликдан маҳрум қилиш жазоси назарда тутилган экан.
Бу рақамларни кўриб, фикр қилсак, карантин қоидаларига амал қилиш қанчалик зарурат экани аён бўлади. Бир бизда эмас, дунёда вазият жиддий. Бошқа мамлакатларда ҳам одамлар сабр қилишга мажбур бўляпти. Карантин қоидалари қатъийлиги вирус қанчалик хавфли эканини тушунтирувчи бир омилдир.
Ҳаммамиз қоидаларга риоя этсак, яқинларимизнинг эркин ҳаётга тезроқ қайтишига ёрдам берган бўламиз.
Дилором Имомова,
Олий Мажлис Қонунчилик палатаси депутати,