Давлатимиз раҳбари Республика комиссиясига коронавирус умуман аниқланмаган ёки эпидемиологик вазият яхшиланган вилоят, туман ва шаҳарларда карантин чекловларини босқичма-босқич юмшатиш чораларини кўриш бўйича топшириқ берди.

Вилоят, туман ва шаҳарларимизда ташкил этилган секторлар карантин чекловларини босқичма-босқич юмшатиш чораларини кўришда самара бериши аниқ.

Ҳар бир туман ва шаҳар аҳолиси сони ўрта ҳисобда 400000 кишини ташкил этади. Республикамизнинг ҳар бир туман ва шаҳрида сектор раҳбарлари 4 ёки 5 кишидан иборат бўлган ишчи гуруҳига эга, яъни ўрта ҳисобда ҳар бир секторга 800-1000 киши (200-250 оилага)га тўғри келади.

Жумладан, 133-Шаҳрисабз сайлов огруги бўйича жами аҳоли сони 365406 (91352 та оила) кишини ташкил этади, шундан тадбиркорлик фаолияти билан шуғулланадиганлар 5709 та (1,6 фоиз), кам таъминланган оилалар сони 1434 (0,4 фоиз) та.

Демак, ҳудудларда сектор раҳбарлари томонидан саноат, қурилиш ва инфратузилма тармоқлари корхоналарининг тўлиқ ишлашини таъминлаш мақсадида қуйидагиларни амалга ошириш лозим:

- ҳудудлар бўйича сектор раҳбарлари бошчилигида бир ёки бир неча маҳаллалар бўйича фидоий ва ташаббускор гуруҳлар фаолиятини шакллантириш;

- сектор раҳбарлари ўз ишчи гуруҳлари ёрдамида ҳудудларидаги юридик шахслар ва тадбиркорлик билан шуғулланаётганларнинг фаолиятини тўлиқ ўрганиб чиқиб, мавжуд муаммо ва камчиликларни аниқлаш;

- ҳудудларидаги мавжуд юридик шахслар ва тадбиркорлар фаолиятига тижорат банклари ёрдамида имтиёзли кредитлар киритиш орқали карантин даврида қўшимча иш ўринларини яратиш;

- ҳудудларда шахсий томорқадан самарали фойдаланиш мақсадида, минерал-ўғитлар сотувини ташкил қилиш ҳамда натижаси бўйича монитиронг юритиш;

- ҳудудларда қурилиш ишларини карантин ва санитария-гигиена қоидаларига тўлиқ риоя қилган ҳолда, ишчилар ойлик маошини имкониятга қараб қисқа вақт оралиғидаги тўловини ташкил қилиш;

- ҳудудларда якка тартибда иш билан бандликни таъминлаш мақсадида қурилиш материалларини ишлаб чиқариш ва сотиш ишларини карантин қоидаларига тўлиқ риоя қилган ҳолда йўлга қўйиш;

- секторларнинг ишчи гуруҳлари бошчилигида маҳалла ва ташаббускор гуруҳлар ҳамкорлигида марказлаштирилган ҳолда ҳудудларда етиштирилган мева-сабзовот маҳсулотларини маҳаллий бозорларга ҳамда экспортга йўналтириш;

- маҳаллаларда кам таъминланган, ёлғиз қариялар, ногиронлар, ёлғиз оналар ҳамда карантин даврида эҳтиёжманд бўлган оилалар рўйхатини қайтадан шакллантириш;

- сектор раҳбарлари ўз ишчи гуруҳлари назоратида маҳаллаларда қайтадан шакллантирилган эҳтиёжманд оилаларга ёрдам кўрсатиш графигини ишлаб чиқиш ва унинг мониторингини юритиш;

- “Саховат ва кўмак” умумхалқ ҳаракатида фаол иштирок этган фуқаролар, юридик шахслар ва тадбиркорларни ОАВ ва бошқа воситалар орқали жамоатчиликка ўрнак сифатида кўрсатиш.

Бугунги кун ҳар биримиз учун синов, саховатпеша инсонлар учун эса меҳр-мурувват кўрсатиш, касал бўлганлар ва эҳтиёжманд оилалар учун сабр-тоқат қилиш, умуман барчамиз учун меҳр-оқибатни кучайтириш учун берилган имконият. Бу имкониятни қўлдан бой берманг, азизлар.

Дилором Имомова,

Олий Мажлис Қонунчилик палатаси депутати,

ЎзХДП фракцияси аъзоси.