Бўлар элнинг болалари бир-бирин дер,

Бўлмас элнинг болалари бир-бирин ер.

Бир бўл энди, кадри баланд қаддингни кер,

Халқ бўл, элим, халқ бўл, элим, халқ бўл, элим!

Муҳаммад Юсуф.

Саховат – шукр аломати. Дарҳақиқат, саховат ва сахийлик энг яхши инсоний хулқлардандир. Саховат киши обрў-эътиборининг покиза сақланишига, эл орасида яхши ном чиқаришига асос бўлади. Инсонлар ўртасида меҳр-муҳаббат пайдо қилади, биродарлик ришталарини мустаҳкамлайди.

Дунёда меҳрнинг, қадриятнинг умри боқийдир. Инсоний фазилатларгина улуғлик сари бошлайди. Қаердаки, меҳр-оқибат, қадр-қиммат мавжуд экан, шу ерда бахтиёрлик, фаровонлик ҳукм сураверади.

Халқимиз учун синовли кечаётган ушбу кунларда дунёдаги энг қиммат, аммо текинга тарқатиладиган бир нарса – меҳр ва муҳаббатни ҳар нарсадан устун қўйиб, эҳтиёжманд оилаларга беғараз ёрдам кўрсатаётган юртдошларимизни ватанимизнинг асл фарзандлари, дея оламиз.

2016 йилда Charities Aid халқаро ташкилоти ўтказган тадқиқотга кўра, Ўзбекистон дунё бўйича энг кўп хайр-саховат қиладиган давлатлар орасида 11-ўринни эгаллаган. МДҲ давлатлари ичида эса пешқадами бўлган.

Ўтган йил ушбу рейтингда Ўзбекистонга 27-ўрин берилганди. Мамлакатнинг рейтингдаги ўрни хайрия ташкилотларига маблағ ўтказиш, кўнгилли сифатида ишлаш, нотаниш муҳтож кишига ёрдам бериш каби учта йўналиш бўйича ўртача кўрсаткичдан келиб чиқиб белгиланган.

World Giving Index 2016 рейтингига биноан, Ўзбекистонда аҳоли энг кўп кўнгилли, яъни бепул саховат ишларини амалга оширишни маъқул кўришар экан.

Муҳтожларга кўмак бериш, якка-ёлғиз кексалар ҳолидан хабар олиш,  ногиронлар ва етим болаларни ҳар томонлама қўллаб-қувватлаш  халқимизнинг қон-қонига сингиб кетган азалий анъаналардан ҳисобланади. 

Дунёнинг барча халқлари, шу жумладан, Ўзбекистон ҳам катта синовдан ўтмоқда. Агар халқ бирлашиб, имкони борлар муҳтожларга ўз ризқини бўлишмас экан, кўпчилик қийналиб қолиши шубҳасиз. Сабаби коронавирус инфекцияси кенг тарқалишининг олдини олиш мақсадида жорий этилган карантин сабабли кундалик даромад эвазига кун кўрувчи юртдошларимиз иқтисод жиҳатидан мушкул аҳволда қолишлари мумкин. Шу сабабли ҳам Президентимиз ташаббуси билан эълон қилинган “Саховат ва кўмак” умумхалқ ҳаракати халқимиз томонидан сидқидилдан қабул қилинди.

Аллоҳга беҳисоб шукрки, юртимизда саховатпеша инсонлар кўп. Хайрия ва эҳсон қилишга шошилаётганлар бисёр. Меҳр-мурувват, ҳамжиҳатлик, сахийлик халқимиз ардоқлаган, асрлар оша амал қилиб келаётган гўзал фазилатдир. Хайр-саховат, сахийлик инсонлар ўртасида меҳр-оқибат ришталарининг мустаҳкамланишига, ўзаро ҳурмат ва тотувликнинг ортишига хизмат қилади. Донолар айтганидек, “Aқлнинг қадри одоб билан, бойлик қадри саховат билан ошади”.

Саховат орқали нафақат бир муҳтожнинг мушкули осон бўлади, саховатпеша улкан савобларга эга бўлади, шу билан бирга, бу ҳаракат мамлакатда халқнинг бирлашиши, Ватан равнақи, ободлиги учун халқ сифатида ягона бир кучга айланишига муҳим омил бўлади.

Хотиржам, осойишта кунларда яхшилик, мурувват қилиш кўпчиликнинг қўлидан келиши мумкин, лекин бугунгидек саросимали кунларда эл дардига малҳам бўлиш, ўз ризқини юртдоши билан баҳам кўриш ҳақиқий ватанпарварлик белгисидир.

Сахийлик энг яхши инсоний хулқлардандир. Пайғамбаримиз Муҳаммад алайҳиссалом яхшилик қилишда, сахийликда, инфоқ-эҳсон қилишда саховатлиларнинг саховатлиси эдилар.

Ҳазрат Оишадан (розияллоҳу анҳо) ривоят қилинади: Набий (саллаллоҳу алайҳи ва саллам) айтдиларки, сахийлик бир дарахтдир, унинг томирлари жаннатда, шохлари эса дунёга тушгандир. Ким унинг бир шохига осилса, уни жаннатга олиб боради. Бахиллик ҳам бир дарахт, томирлари дўзахда ва шохлари дунёга тушган. Ким унинг бир шохига осилса, уни дўзахга олиб боради”.

Халқимиз узоқ тарихи давомида кўплаб қийинчиликларни бошидан ўтказган, ҳар сафар бундай қийин ҳолатларни ўзининг бағрикенглиги, мурувватпешалиги, сахийлиги каби ҳислатлари орқали енгган. Албатта, бизнинг авлод ҳам зиммасига тушган синовни ёруғ юз билан енгиб ўтишига ишонамиз.

Мақсуда Ворисова,

ЎзХДП Марказий Кенгаши раиси ўринбосари,

Олий Мажлис Қонунчилик палатасидаги партия фракцияси аъзоси.