Парламент қуйи палатасида Оилавий тадбиркорлик фаолияти билан шуғулланувчиларга енгилликлар яратиш мақсадида “Оилавий тадбиркорлик тўғрисида”ги қонунга ўзгартириш ва қўшимчалар киритиш юзасидан иш олиб борилмоқда.

Киритилаётган ўзгартиришларга кўра, эндиликда юридик шахс ташкил этмаган ҳолда оилавий тадбиркорлик фаолиятини олиб борувчи тадбиркорлик субеъктлари қонун ҳужжатларида белгиланган тартибда уч нафаргача доимий ишчиларни ёллаб, улар билан меҳнат шартномаси тузишга ҳақли эканлиги белгилаб берилмоқда.

Шу билан бирга, меҳнатга лаёқатли ёшга тўлган бошқа яқин қариндошларини, меҳнатга лаёқатли ёшга тўлган болалари ва невараларининг эрини (хотинини), ака-укалари ва опа-сингилларини, уларнинг хотинини (эрини) ва болаларини оилавий тадбиркорлик ишчиси сифатида жалб этиши мумкин. Бу оилавий корхона ишчиси сони кўпайса-да, солиқ ва бошқа тўловларда ҳам имтиёзга эга бўлиб қолаверади, дегани.

Шунингдек, амалдаги тартибда юридик шахс ташкил этган ҳолда фаолият кўрсатадиган оилавий тадбиркорлик субеъктлари, оилавий корхоналар корхона иштирокчиларининг умумий йиғилишида асосан корхона раҳбарини сайлашар (тайинлаш) эди. Энди умумий йиғилишга корхона раҳбарини вазифасидан озод қилиш ва оилавий корхона иштирокчилари таркибини ўзгартириш ваколатлари бериляпти. Бу жуда характерли ўзгариш.

Дунёдаги энг катта компанияларнинг аксарияти оилавий корхоналардан униб чиққани, уларнинг айримларида бошқарув ҳозир ҳам маълум оилалар қўлида қолаётганини ҳисобга олсак, бу қонун лойиҳасининг аҳамияти янада очилади.

Шерзод Раҳмонов,

Олий Мажлис Қонунчилик палатаси депутати,

Ўзбекистон Халқ демократик партияси фракция аъзоси.