1 май тонги Сирдарё вилоятининг Оқолтин тумани аҳолиси учун ғоят ташвишли тонг бўлди.

Қаттиқ эсган шамол ортидан келган кучли ёмғир туман ҳудудида жойлашган "Сардоба" сув омбори тўғонининг бир қисми ўпирилиб тушишига сабаб бўлди.

Натижада кучли сув оқими сув омбори атрофидаги қишлоқлар, аҳоли яшаш жойлари, қишлоқ хўжалиги экин майдонлари ва коммуникация тармоқларига катта зарар етказди.

Хайриятки, туман аҳолиси ушбу ҳатарли ҳолат юз беришидан бир неча соат олдин огоҳлантирилганлиги ва зудлик билан бошқа ҳудудларга кўчирилганлиги боис аҳоли ўртасида саросималик ва талофатларнинг олди олинди. 11 000 дан ортиқ одамлар Жиззах вилоятининг Мирзачўл туманида жойлашган 4 та мактаб ва коллежлар биноларига ҳамда тумандаги саҳоватли инсонлар хонадонларига жойлаштирилди. Яшаш учун шароитлар яратилди.

Ҳукуматимиз томонидан кўрилган тезкор чора-тадбирлар ва давлатимиз раҳбарининг Оқолтин туманига зудлик билан қилган ташрифи давомида туман аҳолиси билан учрашиб, ушбу офатдан жабрланган ҳар бир инсон алоҳида эътиборга олиниши, ҳамманинг уй-жой ва озиқ-овқат билан таъминланиши тўғрисида таъкидлаб айтган гаплари мазкур ҳодисадан жабрланган аҳолига катта куч-қувват ва ишонч бағишлади.

"20-йил оғир келди".

Шуни ўйлаб юрагим оғриди.

Қуриб кетгур "пандемия" деб халқимиз қанча азоб-уқубатларни тортиб турган бир пайтда бу каби мусибатлар чиқмаса қани эди.

Ҳали Бухоро ва Зоминда бўлган ташвишларни унутолмай турганимизда, "Сардоба" фалокати рўй бериб турса...

Очиғини айтсам, йиғладим.

Ўз-ўзимга бераётган саволларимнинг эса охири йўқдай гўё.

Қанча йиллар оша эрк излаб, яхши ҳаёт илинжида яшаб меҳнат қилган, бир бурда нон топса қўшнисига илинган, қишлоқдоши кулфатини ўзиники деб билган, ямоқ тушган тўнини алмашиб кийган меҳри дарё, сабр-матонатда тенгсиз фидойи халқим, ўз кўксида оламни зир титратган жахонгирларни улғайтирган, бешигида авлиёлар ўсган азиз элим энди ёруғ кунга етганида, кўксига шамол тегиб, ўзи эккан буғдойини ўзи еяётганида, ўзи ўстирган пахтасини ўз устида кўриб қувонган бир пайтида, яна не-не яхши кунларни кутиб орзулари осмон бўлиб турганида шундай ташвишли кунлар ичра яшаш ҳам тақдирмиди балки?

Юртимга кўз тегдими ёки?

Ёки азиз халқимнинг куч-қудрати, меҳр-оқибати, сабр-матонатига бўлган синовмиди бу?

Ҳа бу ҳам бир синов бўлди.

"Ҳеч ким кутмаган синов"...

Ишонаманки, БИЗ бу синовларни ҳам улкан куч ва матонат билан, ҳамжиҳатлик ва бирдамлик, беқиёс меҳр ва оқибат билан биргаликда енгиб ўтамиз.

Ахир биз биргамиз.

Бирлашган эса албатта енгади.

Зулайҳо Акрамова,

Олий Мажлис Қонунчилик палатаси депутати,

ЎзХДП фракцияси аъзоси.