Инсоният яралибди-ки, хурсандчилик ва ташвиш, ютуқ ва қийинчиликлар ҳамиша ёнма-ён юради. Юртимизнинг қадим тарихида бундай воқеалар кўп бўлган. Халқимиз бундай кунларни ақл-идрок, сабр-тоқат ва жасорат билан енгиб ўтган. Сирдарё вилоятида юз берган ҳодисадан жабр кўрганларга ёрдам бериш учун халқимиз қанчалик бирлашгани буни яна бир бор тасдиқлади.

Иқтисодий тараққиёт ва равнақ йўлида илгарилаб бораётган мамлакатимиз сўнгги ойларда жиддий синовларга дуч келди. Март ойларининг ўрталарида юртимизга кириб келган коронавирус пандемияси инсонларни қаттиқ ташвишга солган эди. Бухоро воқеаси, энди эса Сирдарёдаги «Сардоба» сув омборидаги тошқин халқимизнинг қанчалик сабру-матонатли экани Оллоҳ томонидан синовдан ўтказтилаётганга ўхшайди. “Ойнинг ўн беши қоронғу, ўн беши ёруғ” деганларидек, ҳар бир синовнинг ортидан албатта ёруғ кунлар келади.

Халқимизда “Қушнинг уйини бузиш ҳам оғир гуноҳ”, дейди. Оммавий ахборот воситалари орқали Бухоро вилоятида томлари учиб кетган намунали уйларни, 3 йил олдин фойдаланишга топширилган Сирдарё вилоятидаги “Сардоба” сув омборида рўй берган ҳодисаларни кузатиб, мана шу қурилиш ишларини ташкил этган қурувчи-пудратчилар қандай ҳолатда экан, деган савол туғилди.

Ҳодиса юзасидан суриштирув ишлари бошлангани ҳақида расман хабар берилди. Шунинг учун ҳозирча бу масалада кескин хулоса чиқаришга бироз вақт бор, деб ўйлайман.

Ҳозирги кунда асосий вазифа уйларини сув босган, бошпанасиз қолган ҳамюртларимизни қўллаб-қувватлаш, улар рўзғорларини тиклаб олишларига ёрдам кўрсатишдир. Президентимиз бу бўйича қатъий ва аниқ вазифа белгилаб берди.

Давлатимиз раҳбарининг “талафот оқибатларини қисқа вақтда бартараф этамиз, жабр кўрган ҳар бир инсон, ҳар бир хонадонга албатта ёрдам берамиз”, деган сўзлари Сирдарё аҳлига жуда катта мадад ва ишонч берди.

Юртимизга келган ҳар қандай синовни биргаликда енгамиз! Синовлар кетма-кет келди, яхшиликлар ҳам изма-из келишига ишонайлик!

Дилбар Мамаджанова,

Олий Мажлис Қонунчилик палатаси депутати,

ЎзХДП фракцияси аъзоси.