Давлатимиз раҳбарининг 2020 йилги Рамазон ҳайитини нишонлаш арафасида қабул қилган “Жазо муддатини ўтаётган, қилмишига чин кўнгилдан пушаймон бўлган ва тузалиш йўлига қатъий ўтган бир гуруҳ шахсларни афв этиш тўғрисида”ги Фармони замирида бағрикенглик, инсонпарварлик мужассам бўлган ўлмас қадриятларимизнинг ёрқин ифодаси, деб биламан.

Фармонга мувофиқ, Конституциямизнинг 93-моддаси 23-бандига асосан содир этган жинояти учун жазони ижро этиш муассасаларида жазо ўтаётган ҳамда қилмишига чин кўнгилдан пушаймон бўлган ва тузалиш йўлига қатъий ўтгани учун афв этилган 258 нафар фуқаронинг 15 нафари Сурхондарё вилояти бўйича экан. Уларнинг 1 нафари асосий жазодан, 7 нафари жазони ўташдан муддатидан илгари шартли равишда озод этилибди. Қолган 7 нафарига тайинланган озодликдан маҳрум этиш жазосининг муддатлари қисқартирилибди.

Албатта, покланиш ва кечиримлилик ойи бўлган Рамазон ҳайити арафасида улар билан оила аъзоларининг бағри тўлиб, қувончига-қувонч қўшилгани баробарида, мазкур Фармон афв этилган юртдошларимизга жамиятда ўз ўрнини топишлари учун катта имкониятдир.

Ҳозирда Сурхондарё вилоятида ҳам афв этилганларни ижтимоий мослаштириш, моддий-маънавий қўллаб-қувватлаш, саломатликларини тиклаш, ишга жойлаштириш ва шу каби ҳаётий масалаларда амалий ёрдам бериш юзасидан тегишли чора-тадбирлар кўрилмоқда.

Мавжуда Ҳасанова,

Олий Мажлис Қонунчилик палатасига

Сурхондарё вилоятидан сайланган депутат,

ЎзХДП фракцияси аъзоси