Парламентлараро алоқаларни кучайтириш, илғор мамлакатлар парламентлари тажрибасидан ўрганиш Олий Мажлис, хусусан, Қонунчилик палатаси учун жуда муҳим.

Бугун Олий Мажлис Қонунчилик палатасида “Ўзбекистон – Француз” парламентлараро ҳамкорлик гуруҳининг илк йиғилиши бўлиб ўтди. Онлайн видеоконференция форматида ўтказилган ушбу қўшма мажлисда икки давлат ҳамкорлик гуруҳи аъзолари иштирокида парламентлараро алоқаларнинг бугунги ҳолати ва истиқболлари тўғрисида ўзаро фикр алмашилди. Парламентлараро ҳамкорлик гуруҳининг мақсад, вазифалари белгилаб берилди.

Одатда парламент мамлакат ижтимоий-иқтисодий ҳаётида фаол иштирок этиши, халқ манфаатлари кўзланган қарорлар қабул қилиниши учун интилиши, курашувчан иммунитетга эга бўлиши зарур. Биз бундай тажрибани етакчи давлатлар парламентларидан ўрганишимиз керак бўляпти.

Франция давлатчилик тарихида, халқининг ҳозирги даражада салоҳиятга ва дунё халқлари орасида қадр-қимматга эга бўлишида турли даврларда мамлакат парламентида ишлаган, яхши келажак учун қўрқувни енга олган матонатли инсонларнинг хизмати беқиёсдир.

Шу маънода, бизнинг парламентда ҳам ҳаёт қайнашига зарурат бор. Бой тарихдан, амалий тажрибалардан қанча ўргансак, ўрнак олсак, ажойиб ўзгаришлар бўлади, деб ўйлайман.

“Ўзбекистон – Француз” парламентлараро ҳамкорлик гуруҳининг фаолияти самарали йўлга қўйилиши икки давлат ўртасидаги ҳамкорлик муносабатларининг мустаҳкамланишида муҳим аҳамият касб этади.

Ойбарчин Абдуллаева,

Олий Мажлис Қонунчилик палатаси депутати,

“Ўзбекистон – Француз” парламентлараро ҳамкорлик гуруҳи аъзоси.