Ҳар бир давлатнинг, халқнинг эртанги куни қандай бўлиши ёшларга боғлиқ. Улар келажакнинг асосий ҳал қилувчи кучи эканига ишонишлари керак. Шунда мустаҳкам ирода уйғонади, янги ғояларни амалга ошириш учун йўл очилади.

Мамлакатимиздаги демократик жараёнларга янги куч ва ғоялар билан кириб келаётган ёшларни ҳар томонлама қўллаб-қувватлаш, уларга қанот бўлиш эртага етук депутатлар, кучли сиёсатчилар камолга етиши учун катта аҳамиятга эга. Айниқса, Олий Мажлис палаталари ҳузурида Ёшлар парламентининг ташкил этилаётгани депутат ва сенаторларнинг қатъий фикр ва ўткир позициясига эга янги, ёш авлоди шаклланишида муҳим ўрин тутиши шубҳасиздир. Ёшлар парламентини ҳақиқий маънода ёшлар овозига айланади, десак бўлади.

Ёшлар парламенти аъзолари турли йўналишларда фаолият олиб бораётган ташаббускор, кенг дунёқараш ва чуқур билим ҳамда лидерлик салоҳиятига эга 18 – 30 ёш бўлган фуқаролар орасидан (жами 100 нафар) шакллантирилади. Шу орқали ёшларнинг қонун ижодкорлиги жараёнидаги иштироки янада кенгайтирилади. Бунинг бир қатор аҳамиятли томонлари бор, албатта. Аввало, айтиш керакки, жараённинг ичида юрган, масъулиятни ҳис қилган, вақти келганда қатъият кўрсатиб, ўз фикрини дадил ҳимоя қилиш кўникмасига эга ёшлардан эртага қатъиятли, сиёсий билими юқори етук депутатлар чиқади.

Яна бир муҳим жиҳати шуки, ёшлар Ўзбекистон йигит-қизларига бугун нима кераклигини ҳаммадан кўра яхшироқ билади. Ўсиб келаётган ёш авлоднинг ҳаётини ўзгартириш, муаммоларни енгишда учраётган тўсиқларни улар аниқ ва тиниқ кўра олади. Шу маънода, қонун лойиҳалари муҳокамаларида айнан ёшлар вакилларининг иштирок этиши парламентда уларнинг манфаати ишончли ҳимоя қилиниши, камчиликлар, муаммолар асосли тарзда кўриб чиқилиши, янги ғоялар билан суғорилган таклифлар акс этиши учун хизмат қилади.

Ёшлар парламенти аъзолари нафақат қонун лойиҳаларини ишлаб чиқишда, балки парламент назоратини амалга ошириш жараёнида ҳам фаол иштирок этади. Бу эса республика ижтимоий-иқтисодий ривожида ёшларнинг иштирокини кенгайтиришда муҳим ўрин тутади.

Шу ўринда бир масалани ҳам эсдан чиқармаслик керак. Ёшлар парламенти қайноқ, ундаги муҳокама ва мунозаралар табиий бўлиши жуда муҳим. Бунинг учун билимли ва жасоратли ёшларга йўлни кенг очиш, барча жараёнларни шаффоф ўтказиш лозим бўлади. Номига, суънийликка муккасидан кетган ҳолда ташкил этиладиган ёшлар парламенти минглаб, миллионлаб ёигит-қизларнинг хафсаласини пир қилиши мумкинлигидан қўрқиш зарур.

Ойбарчин Абдуллаева,

Олий Мажлис Қонунчилик палатаси депутати,

ЎзХДП фракцияси аъзоси.