Бугунги кунда бутун дунёда коронавирусдан зарарланиш ҳолатлари кескин ошиб бормоқда.

Мамлакатимизда коронавирус инфекциясига қарши кураш бўйича кўрилган тезкор ва қатъий чоралар натижасида шифохоналаримизда коронавирусдан даволанаётганлар сони май ойида 400-450 нафарга тушиб қолган эди. Лекин бугунги кунга келиб шифохоналаримизда даволанаётганлар сони кескин ошганлигини кўрмоқдамиз.

Хўш, бу кўрсаткичларнинг ошишига нималар сабаб бўлди? Коронавирусга қарши курашиш бўйича масъул тиббиёт ходимлари ва бунга жалб қилинган барча давлат ташкилоти ходимлари 24 соат давомида фидоийлик билан хизмат қилмоқда.

Коронавирус инфекцияси бутун дунё олимлари эътиборида бўлиб, унга қарши вакцина топиш учун илмий тадқиқот олиб бормоқда. Ҳар бир давлат инфекцияга қарши миллиардлаб маблағ сарфлаб курашмоқда.

Шунга қарамай, аҳоли орасида кузатилаётган, ижтимоий тармоқларда ёки телеканалларда кўрсатилаётган карантин қоидаларини бузаётган, кўчаларда ниқобсиз юрган инсонлар, уйда ёки кафе ресторанларда туғилган кунини нишонлаётганлар, тўй ва тадбир маросимларда белгиланган меъёр қоидаларига амал қилмаган эътиборсиз ва бепарво инсонларнинг учраётганлиги ачинарли ҳол. Ҳозирги шароитда бепарво ва беэътибор инсон душмандан ҳам хавфлироқ ҳисобланади.

Наҳотки, бундай инсонлар ўз фарзандини, ўз ота-онасини, ака-укаси, бобоси ё бувисини, яқин қариндошлари соғлигини ўйламаслиги мумкин? Бепарволик сабаб ўзига инфекцияни юқтириб олиб, ўзи орқали яқинларига юқтириши, натижада ўзига яқин бўлган инсоннинг умрига завол бўлишни ўйламаслик мумкинми?.. Ўз яқинлари соғлиғини ўйламаган инсон, бошқалар соғлиғини умуман ўйламайди.

Азизларим, бугунги пандемия шароитида ўз-ўзимизни назорат қилмасак, яқинларимизни асрамасак, бепарволикка йўл қўйсак, кейин афсус қилишга кеч қолишимиз мумкин. Шуни унутмайлик.

Дилором Имомова,

Олий Мажлис Қонунчилик палатаси депутати,

ЎзХДП фракцияси аъзоси.