Коронавирус деб аталмиш кўринмас бало дунёнинг кўплаб мамлакатларини қамраб олиб, инсонлар ҳаётига катта хавф туғдирмоқда. Албатта, соғлигимиз ўзимиз ва яқинларимиз учун муҳим. Ўзимизни, яқинларимизни асраш эса ўз қўлимизда.

Мамлакатимизда ҳам шифохоналарга мурожаат қилаётганлар сони кундан-кунга ошиб бораётгани ташвишли, албатта. Биз улар билан ёнма-ён яшаймиз, улар бизнинг яқин қариндошимиз ёки қўшнимиз. Уларнинг ҳаёти, жони биз учун ҳам азиз. Оғир дамда барчамиз бирлашишимиз, бир ёқадан бош чиқаришимиз керак.

Куни кеча давлатимиз раҳбари Тошкент шаҳри ва Тошкент вилоятида коронавирусга қарши курашиш борасидаги ишларни танқид қилди ҳамда масъулларни огоҳлантирди. Давлатимиз раҳбари масъулларнинг ёндашуви, аҳолининг ҳақли талаб ва истакларини инобатга олиш ва касалланганларга тезкор ёрдам бериш борасида аниқ топшириқлар берди. Бундан барчамиз хулоса чиқаришимиз керак.

Тўғрида касалланганларнинг аксарият қисми Тошкент шаҳар ҳудудига тўғри келмоқда. Бундан пойтахтликлар, шаҳар меҳмонлари сергак тортиши керак. Ҳамма карантин қоидаларига бирдек амал қилсагина, бу кўринмас бало чекинади.

Вирусга қарши курашиш, қоидаларга қатъий амал қилиш бўйича кўп гапириляпти, халққа бу борада тез-тез мурожаат қилиняпти. Лекин шунга қарамай, карантин қоидаларига амал қилмаслик ҳолатлари учраяпти. Ёки касаллик аломатларини сезиб, уйда ўзича даволаниб юрганлари ҳам бор. Сўнгги кунларда вирус юқтириш оқибатида рўй бераётган ўлимлар асосан шифокорга кеч мурожаат қилиш оқибатида юзага келмоқда. Қанчадан-қанча инсонлар касалликдан фориғ бўлиб, оила бағрига қайтаяпти. Вақтида мурожаат қилинса, даволаниши ҳам осон кечади.

Ҳушёрлик билан бирга, оиламиз, фарзандларимиз учун ҳам масъулиятли бўлайлик.

Мана, 4 ойдирки тиббиёт ходимлари чинакам жасорат кўрсатган ҳолда меҳнат қилмоқда. Биз уларга кўмак беришимиз керак. Уларга ёрдамимиз эса ўзимизни ўзимиз эҳтиёт қилганимиздир. Бугун баъзи бир юртдошларимиз турли тармоқларда уларнинг фаолиятидан “арз” ҳам қилмоқда. Тўғри, сидқидилдан ишламайдиган ходимлар ҳам бор, аммо уларни деб бутун  шифокорларни айблаш адолатдан бўлармикан?

Бугун биз бир - биримизни тушунишимиз, ҳурмат қилишимиз керак. Барча масъуллар эса ўзларининг вазифаларини виждонан бажаришининг ўзи кифоя. Вақт келади, буларнинг барчаси ортда қолади. Сизу биз сабрли бўлсак етади.

Нигора Эшметова,

ЎзХДП Тошкент шаҳар кенгаши раиси,

халқ депутатлари Тошкент шаҳар Кенгаши депутати