«Тождор вирус» юртимиздаги инсонлар ҳаётига кун сайин хавф солаётган, ҳаммамиздан эҳтиёткорлик, юқори тартиб-интизом, бир-биримизга ғамхўрлик керак бўлиб турган пайтда соғлиқни сақлаш, эҳтиёжмандларни қўллаб-қувватлаш учун ажратилган бюджет маблағлари виждонсизларча талон-тарож қилинаётгани халқимизга хиёнат билан баробар эмасми?..

Ҳозирги кунда «мен бу касалликка чалинмайман», деб ҳеч ким кафолат беролмайди. Касаллик қанча-қанча инсонларнинг ҳаётини олиб кетаётганини чуқур қайғу билан кузатиб бораяпмиз.

Шундай оғир вазиятда инсон қанчалар тубанликка бориши керакки, ўзининг атрофидаги яқинлари, ота-онаси, оиласи, фарзандлари, қариндош-уруғлари, маҳалладошларининг соғлиги учун ажратилаётган маблағларни талон-тарож қилиб, уларнинг ҳаётини хавфга қўйса?.. Бундай кимсалар кўпнинг ҳаётини сақлаб қолиш учун ажратилаётган маблағларни ейиш ёки фарзандларига едиришнинг натижаси нима билан тугашидан хабардормикан?.. Худодан қўрқармикан?..

Ҳудудларда юриб, кўряпмиз: ҳақиқатдан ҳам ейишга бир бурда нони йўқ етим-есир, хонадонида ногирони бор оилалар, кўп қаватли уйларда яшовчи ўзгалар парваришига муҳтож, ишсиз, даромадсиз инсонлар оз эмас. Бундай инсонларнинг ризқига кўз олайтириш, чангал солиш учун ваҳший бўлиш керак.

Айрим масъуллар маҳалладаги эҳтиёжманд оилалар бир четда қолиб, бошқаларга моддий ёрдам расмийлаштиришдек тубан ишларни ҳам давом эттирмоқда. Ҳолбуки, бу маблағ қора қозони қайнамай қолган, ёрдам сўраб маҳаллага чиқишга ҳам ор-номус қиладиган одамларнинг ҳаққику?!

Бир ривоят ёдимга келди:

Қадимда Зулқарнайн ўлим ва нафсни енгишга уринган бир қавмга дуч келади. Бу ердаги одамларнинг қўлида дунё бойлигидан ҳеч бир нарса йўқ эди. Таомлари ҳам сабзавотлардан иборат. Шунингдек, бу қавмнинг одамлари ўзларига қабр қазиб, шу ерда ибодат қилар эдилар. Зулқарнайн қавмнинг ҳукмдорини ҳузурига бориб, ундан сўради:

Сиздаги аҳволни ҳеч кимда кўрмадим. Унинг сири нимада?..

Бизнинг олтин ва кумуш билан ишимиз йўқ. Чунки бир оз олтин ёки кумуш топган кишининг янада кўпроқ топиш учун ҳузурини йўқотганини кўрдик. Шунинг учун ҳам дунё бойлигидан воз кечдик.

Бу қабрлар кимга керак? Нега қабр қазиб, уларнинг ёнида ибодат қилмоқдасизлар? – деб сўради.

Дунё бойлигига майл қилмаслик учун шундай қиламиз. Қабрларни кўриб, бир куни у ерга тушишимизни ўйлаб, ҳамма нарсадан воз кечамиз.

Нега сабзавотдан бошқа ҳеч нарса емайсизлар? Ҳайвон боқиб, сути ва гўштини истеъмол қилсангизлар бўлмайдими?

Ошқозонларимизнинг жонли ҳайвонларга мозор бўлишини истамадик. Сабзавотлар билан ҳаёт кечирмоқдамиз. Зеро, томоқдан ўтгандан кейин ҳеч бир нарсанинг таъми қолмайди, деб жавоб берган экан.

Шу ўринда менинг бир таклифим борки, талон-тарож ҳолатлари билан жиноятларни тўлиғича, бор бўйича – ким бажариб, ким зимдан бошида турганигача ОАВ орқали жамоатчиликка кўрсатиш керак. Бу бошқаларга энг катта сабоқ, айбдорларга энг оғир жазо бўларди.

Дилбар Мамаджанова,

Олий Мажлис Қонунчилик палатаси депутати,

ЎзХДП фракцияси аъзоси