Ўзбекистон Халқ демократик партияси Марказий Кенгаши Ижроия қўмитасининг йиғилиши бўлиб ўтди. Унда партиянинг Сайловолди дастурида асосида 2020 йилга мўлжалланган амалий Харакат дастурининг жорий йил 9 ойликдаги ижроси тўғрисидаги масала кўриб чиқилди.
ЎзХДП Марказий Кенгаши раиси Улуғбек Иноятов йиғилишни очиб берар экан, мамлакатимизда ижтимоий-сиёсий йўналишларда амалга оширилаётган кенг қамровли ислоҳотлар мазмун-моҳияти ва аҳамияти ҳақида фикр-мулоҳазаларини билдирди.
Хусусан, давлатимиз раҳбари кейинги бир ой ичида уч марта, жуда муҳим саналар, яъни Мустақиллигимизнинг 29 йиллигига бағишланган тантанали маросим, Бирлашган Миллатлар Ташкилоти Бош Ассамблеясининг 75-сессияси ва куни-кеча Ўқитувчи ва мураббийлар кунига бағишланган тантанали маросимдаги нутқларида давлатчилигимиз, жамиятимиз тараққиётида том маънода мутлақо янги тараққиёт даврига қадам қўяётганимиз ҳақида халқимизга, халқаро ҳамжамиятга қайта-қайта мурожаат этганига алоҳида эътибор қаратилди.
Ўзбекистонда янги бир уйғониш – Учинчи Ренессанс даври пойдеворини бунёд этишда ёшлар, таълим-тарбия масаласига бирламчи эътибор қаратилаётгани замирида чуқур маъно мужассамлиги таъкидланди.
8 октябрь куни Президентимиз раҳбарлигида ўтказилган видеоселектор йиғилишида ижтимоий, ҳуқуқий, психологик қўллаб-қувватлашга, билим, касб ўрганишга эҳтиёжи ва иштиёқи бор бўлган ишсиз ёшлар ҳамда хотин-қизларни жамиятнинг фаол қатламига қўшиш, ҳудудларда камбағалликка қарши курашиш бўйича янги механизм белгилаб берилгани қайд этилди.
Эндиги энг асосий масала мазкур механизмни самарали ишлатишимизга боғлиқ. Бу борада нафақат маҳаллий ҳокимликлар, мутасадди ташкилотлар, шу билан бирга, парламент ва маҳаллий Кенгашлар депутатлари фаоллик кўрсатиши талаб этилади. Субсидия ва бошқа маблағлар мақсадли йўналтирилиши, ҳунар ўрганишга эҳтиёжи ва иштиёқи борлар тўлиқ ўрганилиши жуда муҳим. Мана шу жараёнда депутатлар фаоллик кўрсатса, ҳаммани масъулиятли бўлишга ундаса, аҳоли билан яқин муносабат, мулоқот муҳити ўрнатилади. Одамларнинг ислоҳотларга ва ўз имкониятларига ишончи ошади. Жамиятда ижтимоий-иқтисодий фаол қатламни кўпайтириш жараёнларига катта ҳисса қўшилади. Бу ўз навбатида ҳудудларда депутатларнинг позицияси мустаҳкамланишига мустаҳкам шароит яратади.
Аксинча, қайси ҳудудда бу ишлар тизимли ташкил этилмаса, ишсизлик билан боғлиқ ижтимоий муаммолар янада чуқурлашади, партиямиз электорати бундан жабр кўради.
Халқ демократик партияси билим, касб ўрганишга эҳтиёжи ва иштиёқи бор ишсиз ёшлар ҳамда хотин-қизлар қўллаб-қувватланиши жойларда камбағалликнинг асосий сабаблари бартараф этилишида долзарб аҳамиятга эга, деб ҳисоблайди.
Бу йўналишдаги ислоҳотлар тактикаси партиямизнинг бош мақсадига тўлиқ мос келади. Ижроқўм йиғилишида ҳар бир партия ташкилоти ва депутатлик бирлашмалари аниқ натижа, электорат манфаатлари йўлида қатъият кўрсатиши учун режалари белгилаб олиши зарурлиги қайд этилди.
Кун тартибидаги асосий масала бўйича ҳудудий партия ташкилотларининг мафкуравий фаолияти, партия сафига янги аъзоларни қабул қилиш, партия ташкилотларининг моддий-техник базасини янада мустаҳкамлаш билан боғлиқ масалалар аниқ фактлар асосида танқидий таҳлил этилди.
Партия ташкилотлари ва депутатлик бирлашмаларининг фаолиятини тубдан такомиллаштириш бўйича депутатлар, вилоят партия кенгашлари мутасаддиларининг фикр-мулоҳаза ва таклифлари тингланди.
Шу асосда Ўзбекистон Халқ демократик партияси Марказий Кенгаши Ижроия қўмитасининг қарори қабул қилинди. Мазкур қарорда партия тизимида танқидий таҳлилни кучайтириш, электорат манфаатларига хизмат қиладиган амалий натижаларни кўпайтириш бўйича чора-тадбирлар белгиланди.
Халқ демократик партияси
Ахборот хизмати.