Мамлакатимизнинг Асосий қонунида фуқароларнинг муносиб ҳаёт кечириши, уларнинг тинчлигини таъминлаш ҳамда инсонпарвар демократик ҳуқуқий давлат барпо этиш олий мақсад этиб белгиланган. Шунингдек, давлат органларини шакллантириш ва бошқаришда фуқаролар ҳамда жамоат ташкилотларининг ҳуқуқлари, уларни рўёбга чиқаришда қонунларнинг устувор эканлиги мустаҳкамланган.

Бинобарин, Конституциямизда 7-моддасига асосан халқ давлат ҳокимиятининг бирдан-бир манбаидир. Бу ғоя демократик тараққиёт йўлини танлаган, инсон ҳуқуқларини олий қадрият деб билган Ўзбекистон халқининг улуғ мақсадларини ифодалайди. Айтиш керакки, ушбу конституциявий меъёр сўнгги йилларда ҳаётимизда янада ёрқинроқ намоён бўлмоқда.

Бугун «Халқ давлат органларига эмас, давлат органлари халққа хизмат қилиши керак», деган тамойил барча бўғиндаги раҳбарлар фаолиятида асосий қоидага айланиши кераклиги кун тартибига чиқди. Натижада ҳар бир раҳбар, маъсул ходимлар жойларга чиқиб, аҳоли муаммоларини ўрганиш ва бартараф этиш бўйича ижобий ишларни амалга ошираётганлигини кўриш мумкин. Халқ билан мулоқотнинг энг муҳим қирраларидан яна бири мамлакатда оқилона сиёсат олиб борилишига, мамлакат ижтимоий-иқтисодий ҳаётида ҳар бир кишининг фаол иштирок этишига кенг йўл очиб берилишига хизмат қилишидир.

Ҳозир барча даражадаги раҳбарлар, маъсул ходимлар жойларга чиқиб, халқимиз билан елкама-елка туриб, уларнинг муаммоларини ўрганиб, бартараф этиш чораларини кўрмоқда. Бу ижобий ишлар халққа яқинлашиш, фуқароларнинг ҳуқуқ ва манфаатларини таъминлашда муҳим аҳамиятга эга, албатта. Эътибор берсак, бу Конституциямизда белгилаб берилган меъёрларнинг амалда таъминланаётганини ҳам билдиради.

Халқ ичига кириб бориш, одамлар билан бамаслаҳат иш кўриш парламент, халқ депутатлари кенгашлари фаолиятида катта ижобий таъсир кўртасаётгани, сайловчилар талаб ва таклифлари парламент ва жамоатчилик назорати кучайишига асос бўлаётганини алоҳида таъкидлаш жоиз. Ўтган даврда ҳукуматнинг парламент олдида ҳисоб бериш даражаси ва масъулияти кучайтирилгани ҳам бунинг яна бир исботи бўлмоқда.

Аҳамиятли томони шундаки, халқ билан мулоқот институтининг ҳаётга кенг жорий этилиши натижасида эҳтиёжманд аҳоли қатлами давлат идораларига, яъни ҳокимлик, суд, ҳуқуқ-тартибот ва бошқа кўплаб ташкилотларга тўғридан-тўғри мурожаат қилиш имкониятига эга бўлмоқда.

Мазкур тамойиллардан келиб чиқиб, биз депутатлар ҳам ўз фаолиятимизда берилган ваколат доирасида кўпроқ одамлар орасида бўлиб, уларнинг фикр ва таклифлари асосидаги амалий ишларимизни кўпайтиришимиз талаб этилади.

Умуман, Конституциямизнинг қайси бир моддасига назар ташламайлик, ҳар бирида демократия, халқчиллик, инсон ҳуқуқи ва эркинлиги ғоялари яққол кўринади. Ундаги устувор қоидалар ҳар бир юртдошимиз ҳаётида тўла-тўкис амалга ошиши учун сидқидилдан хизмат қилишимиз лозим.

Шербек Бўронов,

Олий Мажлис Қонунчилик палатаси депутати,

ЎзХДП фракцияси аъзоси