Ёшлар — ҳар қандай жамиятнинг эртаси. Шу маънода айтадиган бўлсак, улар бугунги ва эртанги кунимизнинг ҳал қилувчи кучидир. Ҳозирда мамлакатимиз аҳолисининг 60 фоизини баркамол авлод эгалари ташкил этишини ҳисобга олсак, юрт тараққиёти кўп жиҳатдан навқирон ўғил-қизларга боғлиқ эканини янада теранроқ тасаввур этамиз.
Ҳозир қайси ёш билан гаплашманг, қайси даврага борманг мамлакатимизда биринчи бор ташкил этилган Ўзбекистон ёшлари форуми ҳақида сўз боряпти. Кечаги кун халқимиз, айниқса, ёшларимиз ҳаётида тарихий воқеа сифатида муҳрланди, дейиш мумкин. Айниқса, анжуманда давлат раҳбарининг иштирок этиши ва нутқ сўзлаши, ёшларга билдирган ишончи, мамлакатимизда ёшларни қўллаб-қувватлаш, уларнинг манфаатига қаратилган катта ислоҳотларнинг бориши ҳақидаги фикрлари кучимизга-куч қўшди. Албатта, халқимиз олдидаги масъулият туйғуси бизни янада фаолроқ бўлишга ундайди.
Давлатимиз раҳбари нутқи аввалида “Мен ҳар гал ёшларимиз билан учрашганимда сизларнинг ғайрат-шижоатингиздан куч-қувват оламан, кўнглим тоғдай кўтарилади. Ҳар бирингиз жонажон Ватанимиз ва халқимизга сидқидилдан хизмат қилиш орзуси билан ёниб яшаётганингизни яхши биламан. Сизларни Ўзбекистоннинг энг катта бойлиги, бебаҳо хазинаси сифатида қадрлайман”, дея таъкидлаб ўтди. Бу ишонч йигит-қизларни катта мақсадлар сари руҳлантирди. Албатта, Ўзбекистон ёшлари билим, куч ва салоҳият жиҳатидан ҳеч кимдан кам эмас.
Учрашувда Президентимиз икки ва ундан ортиқ фарзанди олий ўқув юртида шартнома асосида ўқиётган оилаларга имтиёзли таълим кредити бериш ва кредит тўловини дипломни олгандан сўнг ишга жойлашиб кредит маблағини қайтариш тартиби йўлга қўйилишини айтиб ўтдилар. Бу ёшларимизга олий таълимда ўқиш имкониятларини янада кенгайтиради.
Ҳаммамиз кўриб, гувоҳи бўлиб турибмиз, сўнгги йилларда ёшлар таълим-тарбиясига эътибор тубдан ўзгарди. Ўқиш учун барча шароитлар яратилмоқда. Бугун ёшларимизга таълим олиш, олий ўқув юртларининг бир эмас, бир нечтасига ҳужжат топшириб, иқтидорига қараб, олий ўқув юртларида ўқиш имконияти берилди.
Президентимизнинг ёшлар форумида бир неча фарзанди бор оилаларга имтиёзли таълим кредити бериш йўлга қўйилиши йигит-қизлар учун яна бир қулайлик дегани, албатта. Бу кўпгина ёшлар ва уларнинг ота-оналарини хурсанд қилди. Сабаби ҳамманинг ҳам имконияти тенг эмас.
Бу хушхабар партиямиз электорати бўлган кам таъминланган оилалар, боқувчиси йўқ ёшлар, бир неча фарзандларини олий таълим муассасаларида ўқитаётган ота-оналарнинг кўнглини кўтарди. Фарзандларининг шартнмоа пули ҳақида қайғуриб юрган ижтимоий ҳимояга муҳтож юзлаб, минглаб оилаларнинг оғири енгил бўладиган бўлди.
Форумда кейинги йилдан бошлаб олий таълим муассасаларига кириш имтиҳонларида энг юқори балл тўплаган 200 нафар ёшлар учун Президент гранти жорий этилиши, агар мавжуд Президент стипендияси фақат бир ўқув йили учун мўлжалланган бўлса, ушбу грант маблағлари тўрт йил давомида тўлаб борилиши ҳам иқтидорли, билимга чанқоқ ёшларимизга яна бир катта имкониятлар эшигини очади.
Ёшлар форуми биз ёшлар қалбида Ватанга муҳаббат, ёруғ келажакка ишонч ҳиссини янада кучайтирди. Биз ўз билим ва салоҳиятимизни она-Ватанимиз, халқимиз истиқболи йўлида сарфлашга тайёрмиз.
Жаҳонгир Кабиржонов,
Ўзбекистон ХДП Марказий Кенгаши сектор мудири.