Олий Мажлис Қонунчилик палатасидаги Халқ демократик партиясининг фракциясининг йиғилиши бўлиб ўтди.

Депутатлар йиғилишда “Сайлов тўғрисидаги қонун ҳужжатлари такомиллаштирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида”ги қонун лойиҳасини иккинчи ўқишда кўриб чиқишди.

Қонун лойиҳасига халқаро сайлов стандартлари асосида сайлов қонунчилиги янада такомиллаштириш, хусусан, халқ депутатлари туман (шаҳар) Кенгашларига сайлов ўтказувчи округ сайлов комиссиялари институтини тугатиш, уларнинг ваколатларини туман (шаҳар) сайлов комиссиялари зиммасига юклаш кўзда тутилмоқда.

Шунингдек, қонун лойиҳасида Ўзбекистон Республикаси Президенти сайлови, Ўзбекистон Республикаси Олий Мажлисининг Қонунчилик палатасига ҳамда Қорақалпоғистон Республикаси Жўқорғи Кенгесига, маҳаллий давлат ҳокимияти вакиллик органларига сайлов уларнинг конституциявий ваколат муддати тугайдиган йилда – октябрь ойи учинчи ўн кунлигининг биринчи якшанбасида ўтказилиши таклиф этилмоқда.

ЎзХДП фракцияси аъзолари сайловлар муддатининг қиш фаслидан кузга кўчирилиши сайловлардан кейинги сиёсий тадбирларни янги йилгача бўлган муддатда ўтказиб олиш, 5 йиллик муддат учун стратегик вазифаларни ҳар томонлама пишиқ ишлаб чиқиш имкониятларини беришини таъкидлаб, қонун лойиҳасини қўллаб-қувватлашди.

Халқ демократик партияси

Ахборот хизмати