Техника жадал ривожланиб бораётган бугунги даврда юртимизда илм-фанга бўлган эътибор янада кучайди. Бу борада, айниқса аниқ фанлар, жумладан, физика ва математика фанларни ўрганишга муносабат ўзгармоқда. Жорий йил давлат дастурларида ушбу фанларни ривожлантириш учун аниқ мақсадлар белгилангани фикримизнинг яна бир исботидир.
Мазкур йўналишда Ўзбекистон Халқ демократик партияси Тошкент шаҳар Кенгаши томонидан ҳам қатор лойиҳалар амалга оширилмоқда. Жумладан, ЎзХДП Олмазор туман Кенгаши ташаббуси билан “Ёшлар учинчи ренесанс драйвери” мавзусида Ўзбекистон миллий университетида амалий семинар ташкил этилди. Тадбирда партиянинг Олмазор туман Кенгаши “Истиқбол” ёшлар қаноти етакчилари ҳамда Ўзбекистон миллий университети талабалари иштирок этди.
Очиқ мулоқот руҳида, қизғин таклиф ҳамда ташаббусларга бой ўтган амалий семинар якунида 20 нафар ёшларни ўз атрофида бирлаштирган “Ёш тадқиқотчилар” фан клуби ташкил этилди. Клуб фаолиятини ривожлантириш ва ёшларни унга кенг жалб этиш бўйича чоралар белгилаб олинди. Шу каби клубларни пойтахтимиздаги барча олий таълим муассасалари ҳузурида ташкил этиш борасида иш олиб боришга келишиб олинди.
А. Мамаджонов,
ЎзХДП Тошкент шаҳар Кенгаши сектор мудири.