Бугун Олий Мажлис Қонунчилик палатасида умумий ўрта таълим мактабларининг моддий-техник базасини яхшилаш бўйича амалга оширилаётган ишлар мутасадди вазирликлар вакиллари иштирокида муҳокама қилинди.

Мактабларнинг таъмирланиши, жиҳозланиши билан боғлиқ тизимли муаммолар бўйича депутатлар томонидан кўплаб эътирозлар билдирилди. Таъмирланган мактаб маълум бир йиллардан сўнг яна таъмирга тушмоқда, ундан оғир аҳволда бўлган мактаблар эса яна таъмирланмасдан қолаётган ҳолатлар учрамоқда. Бу жамоатчилик, ота-оналар, қолаверса, ўқитувчиларнинг ҳам ҳақли эътирозларига сабаб бўлмоқда.

Ушбу эътирозлардан келиб чиқиб, хулосам ва таклифим бор.

Инвестиция дастури асосида қурилиши ва таъмирланиши, моддий-техник базаси яхшиланиши режалаштирилаётган мактаблар дастлаб халқ депутатлари туман, сўнг вилоят Кенгашида муҳокама қилиниши керак. Умумий рўйхат шаклланганидан сўнг Олий Мажлис Қонунчилик палатасига киритилган ҳолда ишчи тартибда келишиш мақсадга мувофиқ. Шундан сўнг ушбу рўйхат асосида инвестиция дастурлари шаффоф ҳолатда шакллантирилиши керак. Жамоатчилик ҳам, депутатлар ҳам, оммавий ахборот воситалари вакиллари ҳам бу ҳақда билсин. Шунда жамоатчилик назоратини ўрнатиш, шубҳали саволлар ва ҳолатларга барҳам бериш имконига эга бўламиз.

Чунки халқ орасида “вазир ўқиган”, “ҳоким айтган”, “танишини топган” мактаблар зўр бўлаверади, чеккароқ мактаблар эътибордан қолаверади, деган саволомуз эътирозлар ҳам йўқ эмас. Бутун мамлакатда қайси мактабга қанча маблағ қачон ажратилишини бир икки мутасаддининг ихтиёрига бериб қўйиш хато, деб ўйлайман.

Ўзи шундоғам бюджет имкониятлари чекланган, ҳамма мактабни бирданига зўр ҳолатга келтириш имконсиз. Шундай экан, биринчи навбатда энг зарур мактабларга пул ажратайлик. Бюджет пули амалдорники, қайсидир вазирликни эмас, у халқимизнинг энг муҳим эҳтиёжларига ишлатилиши зарур.

Барчани куттирмасдан, йиллар давомида умид қилдирмасдан, аниқ, манзилли, асосийси, шаффоф ишлаш вақти келди.

Фирдавс Шарипов,

Олий Мажлис Қонунчилик палатаси депутати,

ЎзХДП фракцияси аъзоси.