Янги йил байрамини ҳаммадан кўра кўпроқ болалар яхши кўради. Қорбобо ва қорқиздан совға олиш, арча атрофида қўл ушлашиб ўйинга тушиш, яхши ниятлар қилиб мўжизалар кутиш болажонларнинг жону дилидир...
Халқ депутатлари Наманган шаҳар Кенгаши депутати Абдувоҳид Азимов болажонларга шундай ҳаяжонли дақиқалар тақдим этиш мақсадида Ўзбекистон Халқ демократик партияси вилоят кенгаши билан ҳамкорликда Наманган шаҳридаги “Диёр” тантаналар мажмуасида “Меҳр улашинг” акцияси доирасида Янги йил байрами ташкил этилишига бош бўлди. Тадбирдан яна бир мақсад депутат 50 ёшга тўлиши муносабати билан болажонларга атаб дастурхон ёзиш ва уларнинг қалбига қувонч улашиш эди.
Тадбирга Наманган шаҳридаги кам таъминланган, ижтимоий қўллаб-қувватлашга эҳтиёжманд ва “Темир дафтар”, “Аёллар дафтари” рўйхатига киритилган оилалар ҳамда Наманган шаҳар Кўзи ожизлар жамияти аъзоларининг фарзандлари таклиф этилди.
Вилоят мусиқали драма театри актёрлари томонидан намойиш этилган саҳна кўринишларида Қорбобо ва Қорқиз, эртак қаҳрамонлари болажонларга бир олам шодлик улашган бўлса, Наманган шаҳар хокимлиги ахборот хизмати томонидан уюштирилган интерактив ўйинлар байрамнинг жажжи иштирокчиларининг билим ва дунёқарашларини бойитишга хизмат қилди.
Тадбир сўнгида барча болажонларга байрам совғалари улашилди.
Ўзбекистон ХДП Наманган вилоят кенгаши
Ахборот хизмати.