Қонунчиликка кўра, депутат сўрови қайси мансабдор шахс номига юборилган бўлса, жавоб хати ўша мансабдор шахс ёки унинг вазифасини бажарувчи томонидан имзоланади ва сўров олинган кундан бошлаб ўн кундан кечиктирмай, сўралган барча ҳужжатларни илова қилган ҳолда депутатга юборилиши шарт.
Депутат сўрови депутатнинг тегишли ҳудудда жойлашган давлат ҳокимияти ва бошқарув органларининг мансабдор шахсларига уларнинг ваколатларига кирадиган масалалар юзасидан асослантирилган тушунтириш бериш ёки ўз нуқтаи назарини баён қилиш талаби кўрсатилган мурожаати ҳисобланади.
Қонун талаби барча мутасаддилар томонидан бир хилда бажариляптими? Халқ вакилларига нисбатан беписандлик, қонунларга нисбатан ҳурматсизлик каби ҳолатлар кузатилмаяптими?
Афсуски, бу каби саволларга, “йўқ”, деб жавоб бериб бўлмайди. Мутасадди раҳбарларнинг депутат сўровини назар-писанд этмаслик, қонунларда кўрсатилган муддатларда жавоб бермаслик ҳолатлари ҳали ҳам учраб турибди.
Мисол учун, Олий Мажлис Қонунчилик палатаси депутати, Халқ демократик партияси фракцияси аъзоси Фирдавс Шарипов томонидан “Ҳудудий электр тармоқлари” АЖ бошқаруви раиси Улуғбек Мустафоевга 2021 йил 27 декабрь санаси билан депутат сўрови юборилган. Депутат сўровида 400 мингга яқин аҳоли яшаётган Денов туманида фуқароларни ўйлантираётган муҳим масала – электр энергияси таъминотини яхшилаш мақсадида монипулятор, трансформаторлар ҳамда симёғочлар ажратиш масаласини кўриб чиқиш сўралган.
Орадан бир ой вақт ўтган бўлса-да, раис жаноблари парламент вакилига икки энлик жавоб хати ёзишни ўзига эп кўрмаяпти шекилли. Бу билан Ўзбекистон Республикасининг “Парламент назорати тўғрисида”ги қонун талаби бузилган. Кишини ўйлантирадигани шуки, мутасаддилар Олий Мажлис Қонунчилик палатаси депутати сўровига республика ташкилоти шу тарзда муносабатда бўлаётганини қандай тушуниш мумкин?
Шу кунларда “Ҳудудий электр тармоқлари” АЖ тизимида иш кўпайган бўлиши мумкин, барча ходимларига куч-қувват тилаймиз. Шу билан бирга, бошқарув раиси бир ой аввал юборилган сўровга жавоб беришга вақт ва имкон топади, деб ўйлаймиз.
Халқ демократик партияси
Ахборот хизмати