Давлатимиз раҳбари Шавкат Мирзиёевнинг Олий Мажлис Қонунчилик палатасининг биринчи мажлисидаги нутқини эшитиб, юртимиз эришаётган ютуқ ва марралар замирида ётган машаққатли меҳнат ҳамда ташқи сиёсатда олиб борилаётган қатъий ва дадил сиёсатнинг моҳияти ҳақида янада теран тасаввурга эга бўлдик.
Эътиборлиси, кейинги йилларда мамлакатимиз қонун чиқарувчи олий органининг ўрни ва роли қай даражада ўзгаргани, унинг фаолиятида қандай тизимли ўзгаришлар, янгиланишлар рўй бергани таҳлиллар билан очиб берилди.
Дарҳақиқат, ҳар бир соҳада олиб борилаётган тизимли ва кўламдор ишлар жаҳон ҳамжамияти томонидан эътироф этилиб, хорижий оммавий ахборот воситаларида кенг ёритилмоқда. Бу каби ютуқлар юртимиздаги сиёсий танловнинг, шакллантирилган барқарор, самарали сиёсий тизимнинг қанчалик тўғри эканидан далолатдир.
Мамлакатимизда кенг кўламли ислоҳотларни янги босқичда давом эттириш, иқтисодиётимизни барқарор суръатлар билан ривожлантиришнинг ҳуқуқий асосларини белгилаб берувчи миллий қонунчилигимизни янада такомиллаштириш биз — янги шаклланган парламент депутатларидан катта масъулият талаб қилишини ҳис этиб турибмиз. Шу боис, биз бу борада барча билим ва тажрибамизни ишга солиб, саъй-ҳаракатларимизни бир мақсад йўлида бирлаштирамиз, деб умид қиламан.
Фирдавс ШАРИПОВ,
Халқ демократик партияси фракцияси аъзоси