Халқ демократик партияси Марказий Кенгашида партия фракцияси аъзолари билан учрашув бўлиб ўтди. Унда Халқ демократик партиясининг 2020-2024 йилларга мўлжалланган амалий Ҳаракат дастурини ҳаётга янада яқинлаштириш, ҳудудлардаги ҳақиқий аҳволдан келиб чиқиб, аниқ чора-тадбирлар белгилаш масалалари муҳокама этилди. Фракция аъзолари бу бўйича ўз фикр-мулоҳазалари ва таклифларини беришди.
Учрашувни партия Марказий Кенгаши раиси, Олий Мажлис Қонунчилик палатасидаги фракция раҳбари Улуғбек Иноятов очиб берди. Бугун депутатдан ҳаётнинг устувор ва долзарб йўналишларини ўз ичига олган ижтимоий-иқтисодий соҳалар ривожини таҳлил қилиб бориш, ечимини кутаётган масалаларни ҳал этиш учун белни маҳкам боғлаб курашиш талаб этилаётганини алоҳида таъкидлаб ўтди.
– Сўнгги йилларда парламентнинг мавқеи, ваколатлари анча кенгайди. Унинг фаолият кўлами кенгайгани сари у ерда ишлайдиган депутатларнинг масъулияти, салоҳияти, талабчанлиги ҳам ўсиб бориши тақозо этилади. Ҳар биримиз бу ҳақда яна бир бор жиддий ўйлаб кўришимиз, ишимизни ҳар томонлама самарали ташкил этишимиз керак, – деди фракция раҳбари.
Учрашувда партиянинг 2020-2024 йилларга мўлжалланган амалий Ҳаракат дастури таҳлил этилди. Депутатлар ўзлари сайланган жойлардаги ҳақиқий вазиятдан келиб чиқиб, дастурни такомиллаштириш бўйича бир қатор таклифлар беришди.
Халқ демократик партияси фракцияси фаолиятини таъсирчан ва аниқ натижаларга йўналтирилган тарзда ташкил этиш юзасидан ҳам таклифлар берилди.
Халқ демократик партияси
Ахборот хизмати