Президентимизнинг Мурожаатномасини тинглаб бўлгач, чуқур ўйга толдим, раҳбарларга, барчамизга қарата айтилган “ўзгаринглар, эски замонлар ўтди”, деган чақириқ бот-бот хаёлимдан ўтди.

Фикримча, ислоҳот инсоннинг ўзидан бошланади. Ҳар бир депутат ўзи учун қайд этиб олган вазифа ва масалалар ижросига қаратилган “шахсий йўл харитасини” тузиб олиши лозим. Энди “бу менинг соҳам эмас” деган эскича қараш билан яшаб бўлмаслигини ҳаётнинг ўзи кўрсатиб турибди. Модомики, халқ вакили 135 мингдан ортиқ аҳоли яшайдиган ҳудуд манфаатларини ифода этар экан, шу ердаги ҳар бир соҳанинг ичига киришдан ўзга йўл йўқ.

Олий Мажлис палаталарининг қўшма мажлисида, Мурожаатномада аввало, қонун, фармон ва қарорлар ижросини тўғри ташкил этиб, амалга оширилаётган ислоҳотларни ҳар бир туман ва қишлоққача етиб боришини таъминлаш зарурлиги таъкидланди. Бу эса, биз – депутатлардан назорат тадбирларига алоҳида устуворлик беришни талаб қилади.

Бу борада халқимизга хос, оддий ҳақиқат нуқтаи назаридан ёндашсак, “вазифа тўғри берилса, унинг ижроси албатта таъминланади”, деган қоиданинг аҳамияти яққол намоён бўлади. Бошқача айтганда, қабул қилинаётган меъёрий-ҳуқуқий хужжатларнинг тўғридан-тўғри ишлаши, ўзида реал муаммо ечимига қаратилган аниқ нормаларни акс эттириши учун изланишдан тўхтамаслигимиз лозим. Бинобарин, пухта қонунлар ишлаб чиқиш уларнинг самарали ижроси сари қўйилган илк ва ўта муҳим қадамдир.

Бу борада парламентнинг янги таркиби эскисининг давомчиси эмас, ўз даврининг бошловчиси бўлмоғи лозим. Бунга қандай эришилади, деган залворли саволга эса ўзимиз жавоб топишимиз керак.

Зулайҳо Акрамова,

Халқ демократик партиясининг

Олий Мажлис Қонунчилик палатасидаги фракцияси аъзоси