Шу кунларда Ҳаракатлар стратегиясини “Илм, маърифат ва рақамли иқтисодиётни ривожлантириш йили”да амалга оширишга оид давлат дастури лойиҳаси бўйича умумхалқ муҳокамаси давом этмоқда. Мазкур жараёнда партия фаоллари ҳам ўзларининг таклифлари билан иштирок этмоқда.
Хусусан, Дастур лойиҳасининг 15-“Электрон парламент” тизими лойиҳаларини амалга ошириш бандига Халқ демократик партияси Марказий Кенгаши бўлим бошлиғи Акмал Турсунбоев "Менинг депутатим" мобил иловасини ишга тушириш бўйича таклиф берган. Шу орқали депутат билан сайловчининг бевосита мулоқоти йўлга қўйилади. Иловада ҳар бир округ бўйича депутатларга алоҳида банд ажратилади ва тизимда рўйхатдан ўтган сайловчи ўз яшаш манзилини киритгандан сўнг автоматик тарзда ўша округдан сайланган депутатни тармоғига киради. Депутат бу иловага кунлик қилган ишларини ҳам киритиб бориш имконига эга бўлади. Парламентдаги қонун лойиҳаларини сайловчилар билан муҳокама қилиш тизими амалга ошади, айни пайтда, қонунларга сайловчилар томонидан ҳам баҳо бериб борилади, деган таклиф билдирилган.
Дастур лойиҳасида республика даражасида қарорлар қабул қилишда маҳаллий ҳокимликларнинг иштирокини таъминлаш кўзда тутилган. Ушбу масала бўйича шундай фикр билдирилган: “Бу тизимга зарурият йўқ. Маҳаллий кенгашлар бор. Ҳудудий муҳокамаларни шу кенгашлардаги депутатлар билан ўтказиш мумкин. Қолаверса, ҳоким кенгаш раиси ва сенатордир. Лекин ҳоким билан келишиш институтини жорий қилиш мақсадга мувофиқ эмас”.
Давлат дастури лойиҳасининг 37-бандида жамоатчилик назоратини янада кучайтириш, давлат ва жамият ўртасида ўзаро яқин ҳамкорликни ўрнатиш масалалари кўзда тутилган. “Бу йўналиш бўйича Жамоатчилик палатасини шакллантиришда аввало нодавлат нотижорат ташкилотлар, жамоат ташкилотлари ва сиёсий партияларда фаолият кўрсатаётган кадрларни жалб қилиш лозим” деган фикр билдирилган.
Йўл ҳаракати хавфсизлиги соҳасидаги рўйхатлаш ва имтиҳонларни олиш тартиб-таомилларини соддалаштириш банди бўйича автомобилларни расмийлаштиришда енгилликлар яратиш лозим, деган таклиф илгари сурилган: “Янги сотиб олинган автомашиналарга йўл фонди учун 3 фоиз тўланади. Агар уни яна бошқа одам сотиб олса, қайта расмийлаштириш учун яна қайтадан йўл фонди учун катта миқдорда бож тўланади. Бу ўртача яна 2.5 млн сўм атрофида бўлади. Ҳар сафар шу автомашина олди-сотди бўлганда шу маблағ тўланаверади. Бу божни камайтириш зарур”.
Шунингдек, дастур лойиҳасининг 82-бандида “яширин иқтисодиёт”нинг улушини қисқартириш чора-тадбирларини амалга ошириш вазифаси қўйилган. Унга қуйидагича таклиф берилган: “бугунги кунда айрим фаолиятларни лицензиялашда қатор ноқулайлик ва мураккабликлар бор. Мисол учун, ўзининг шахсий автоуловида киракашлик қилаётган ҳайдовчиар фаолиятини лицензиялаш бўйича бир қатор тартиб-қоидалар бор. Тартибни шунчалар мураккаблаштирилганки, ҳайдовчилар яширинча, яъни лицензиясиз ишлашни маъқул кўришмоқда. Ваҳоланки, уларни фаолиятига рухсат берувчи битта қадамдан иборат, ҳам арзон тизим жорий қилиш жоиз. Давлат хизматлари маркази ҳам бу каби рухсатномаларни бериши мумкин.
Лойиҳанинг 192-бандида “тиббиёт кадрларини тайёрлаш, қайта тайёрлаш ва малакасини ошириш тизимини такомиллаштириш” вазифаси белгиланган. Ушбу масала юзасидан бевосита партия Сайловолди дастуридан келиб чиқиб, таклиф берилган: “қабул квоталарини берганда ҳудудлардан тиббиётга қизиқиши бор болаларни ўша жойда ишлаш шарти билан олиб келиб ўқитиш лозим. Шу билан ҳудудлардаги кадрлар муаммоси енгиллашади, бу бутун дунёда бор амалиёт”.
Халқ демократик партияси
Ахборот хизмати