Давлатимиз раҳбари даставвал Парламентга йўллаган Мурожаатномасида юртимиздаги камбағал инсонларнинг сонини очиқлаган эди. Ушбу масалани бартараф этиш юзасидан Мурожаатномада тегишли таклифлар айтилганди.
Куни кеча ушбу масалага амалий қадамлар ташланди. Белгиланган вазифаларни амалга оширишга бутун бир вазирлик масъул этиб белгиланди.
Дарҳақиқат инсонларнинг турмуш шароитини яхшилаш учун аввало уларни пул топишга ўргатиш лозим. Ўз мустақил фаолиятини олиб бораётган молиявий мустақил бўлган инсон ўз оиласига ва давлатга ҳам фойда. Афсуски, аҳолимизнинг аксарият қисми боқимандачилик кайфиятига буткул тушиб қолган.
Шахсан Президент ташаббуси билан қатор Давлат дастурлари ишлаб чиқилди ва изчиллик билан ижро этилмоқда. Хусусан ёшлар ва хотин – қизлар бандлигини таъминлаш, уларнинг ўз мустақил бизнесини йўлга қўйишлари учун бошланғич ёрдам яъни имтиёзли шартларда микрокредитлар тақдим этилди. Лекин афсус билан таъкидлаш керакки, ажратилган кредитлар жойлардаги масъуллар томонидан манзилли равишда эгаларига етказилмаяпти. Аксинча, ўз бизнес фаолиятини йўлга қўйган, кредит олишга муҳтож бўлмаган фуқароларга тақдим этилиш ҳоллари учраб турибди. Натижада 20-25 млн сўм атрофида олинган кредит билан фаолиятини бошлаб, яна 2 нафар тенгқурларини иш билан таъминлаш кўзда тутилган бўлса-да, амалда 1 млрд.га яқин кредит олиб 10 нафар ишчи ўрни яратган ҳолатлар ҳам бўлди. Ваҳоланки, ушбу сумма 50 нафарга яқин қўлида ҳунари бор бўлган йигит-қизларга тақдим этилганида эди, камида 100 нафарга яқин йигит қизларнинг бандлиги таъминланади.
Яна бир жиҳатни ҳам эътиборга олиш лозим. Яъни қўлида ҳунари ва ёки аниқ режаси йўқ бўлган фуқароларга ҳам кредитлар ажратилди. Натижада бундай инсонлар аниқ бир йўналишда иш бошламади ва кредитни тўлашга келганда имкониятсиз қолишди.
Ушбу ҳолатларни бартараф этиш ва бу борада янгича ёндашув билан ишлашни Президентимиз яна бир бор таъкидлаб ўтди. Бундан буён йигит-қизлар қизиқишига қараб касбга ўқитилади, уларга тадбиркорлик қилиш кўникмалари ўргатилади.
Шу борада айрим фикрларни билдиришни жоиз деб топдим. Аввало касбга ўргатишда таҳлиллар ва тадқиқотлар қилиш мақсадга мувофиқ, деб ўйлайман.
Аввало, меҳнат бозоридаги талабни ўрганиш лозим. Шундан сўнг талабга қараб касблар ўргатилсагина механизм ишлайди.
Давлат божхона қўмитаси билан Иқтисодиёт ва саноат вазирлиги ҳамкорликда мамлакатимизга кўп импорт қилинаётган маҳсулотлар, кийимлар ва бошқа техник ускуналарни ўрганиб таҳлил қилиши керак. Ўрганиш натижаларидан келиб чиқиб, кичик ишлаб чиқариш объектларини ҳудудлардаги камбағал оилалар вакилларининг малакасини оширгандан сўнг ташкил қилиш яхши самара беради.
Биргина мисол келтирадиган бўлсак, автомобиллар салонида доим фойдаланиладиган ҳаво ҳушбўйлаштиргичларни олайлик. Хитойдан ва бошқа давлатлардан катта миқдорда кириб келадиган ушбу воситани ўзимизда ишлаб чиқаришни йўлга қўядиган бўлсак, валюталарнинг ҳам четга чиқиб кетиши камаяди. Бу каби импорт орқали бозоримизга кириб келаётган маҳсулотлар талайгина. Уларни аниқлаб ўзимизда ишлаб чиқариб, бунга камбағал оилалар аъзоларини кенг жалб қилсак, бу орқали кўплаб ютуқларга эришиш мумкин. Маҳсулотларимиз махаллийлашиши билан бирга кўплаб иш ўринларини яратган бўламиз.
Акмал ТУРСУНБОЕВ,
Халқ демократик партияси бўлим бошлиғи.